الكاتب
مشــاويـــر
حياتنا عباره عن مشاوير :
مشوار صغير للحى اللى ساكن فيه كان كفيل انى اغير تفكيرى فى حجات كنت لغاية وقت قريب فاكرها من المسلمات يا ترى مين صح ومين غلط مين بيساعد البلد ومين بحسن نيه بيضرها نماذج كتير قابلتها .
واحد بيقدم طلب علشان المحل بتاعه اتشمع بيشتكى من الظلم وانه بياكل عيش ومعاه كتير بيشتغلوا وفاتحين بيوت يرد عليه الموظف يقوله لازم ترخيص علشان تبقا فيه وسائل حمايه ليك ولعمالك لو لا قدر الله حصل حريق كلام الطرفين مقنع بس مين صح الدوله اللى وضعت القوانين حمايه للمواطن حتى من جهله ببعض الامور ولا المواطن اللى شايف انه مظلوم .
واحد تانى واقف يشتكى ان الحى بيهد فى عماره بتاعته وبيقول شقا عمرى وتحويشة العمر وسنين الغربه بتضيع يرد عليه موظف تانى يقوله وليه بنتها بدون ترخيص انت كده زودت الاحمال على شبكة الصرف والمياه والكهربا فى المنطقه لان الشبكات ده اتصممت لاستيعاب احمال معينه متوافقه مع القانون اللى انت خالفته انت كده بتضر غيرك وكمان نعرف منين انك بنيت العماره بطريقه سليمه لومعاك رخصه هنعرف مين المهندس اللى بناها لكن من غير رخصه يبقا مفيش مهندس معروف والعماره احتمال تقع على السكان .. تانى كلام الطرفين مقنع المواطن اللى عاوز يستثمر القرشين اللى تعب فيهم وبرضه الدوله اللى بتحمى المواطن ده وغيره بقوانين لها رؤيه لابعاد اكبر من استيعاب المواطن .
قبل ما اخلص مشوارى وصلت لقناعه ان لازم يكون فى منظومه تساعد المواطن يفهم القوانين وهي ليه اتعملت اساسا وهو بنفسه هيساعد فى تطبيقها ومسؤولية الدوله انه المواطن يفهم القانون ومسؤولية المواطن انه يعرف قوانين بلده هنختصر ساعتها جزءكبيرمن عشوائيهةحياتنا
التعليقات