سؤال الرحيل لمبارك من أحمد خفاجي
سؤال مباشر يا أسمك إيه
ولو هتسأل …..ليه بنسأل
إحنا نسأل
إنت قاعد لسه ليه ؟؟؟
وناوي تفضل أد إيه؟؟
ولو بتسأل ….إحنا مين؟؟
نسأل إحنا
إنت إيه ؟؟
إحنا ناس م الناس ولينا
حق بندور عليه
لكل واحد بعد واحد
في الأمن صفحه أو دوسيه
لكل واحد منا واحد
إتظلم زعلان عليه
سؤالنا واحد يا أسمك إيه
إنت قاعد للنهايه؟؟
والا جايبينك لغايه؟؟؟
إنت مندوب الحمايه؟؟؟
والا مصلحة الجبايه؟؟؟
والا مصري والا بيه؟؟؟
سؤالنا تاني يا أسمك إيه
معاك فلوس أد إيه؟؟؟
عاين فلوسك بالدولار؟؟
والا محووش بالجنيه؟؟
إحنا ما بنحسدش حد
بس كل شئ لو حد
إنت لما شبعت عد
إطلع معاش وكفايه هد
إحنا عملنا فيكو إيه
والشعب ذنبو بس إيه
تقرفوه … ..تطلع عينيه
سؤالنا تاني بإختصار
لو حد فينا خووش حمار
الليل متبت في السما
ما يزيحوش غير النهار
يا بخت من خفف وزار
يا بخت من يحكم سنه
يا بخت من سلم و غار
سؤالنا تاني بالأصول
إمتا هيغورو المغول ؟؟؟
إنت ماشي لما يمشو ؟؟
والا قاعد علي طول؟؟؟
أحمد خفاجي
في صباح الأحد 11 إبريل 2010
التعليقات