أشرف نسيم يعتذر لأنه لم يفهم ما حدث صح وينصحكم بالعودة إلى الصواب
أنا آسف
الحقيقة لازم اعتذر لأني ما فهمتش اللى بيحصل صح
السيد صفوت الشريف كان صح
دى فعلا فوضى خلاقة... أمريكا عايزة حكام تسمع للناس وتخليهم ينسوها شوية
عايزة إسرائيل تعيش فى قلق علشان هى كمان ما تقرفهاش
فيفي عبده كانت صح... ربنا خلق الكون فى ست أيام ... ليه الريس مبارك لازم يمشي فورا
حمادة صدقي كان صح... المتظاهرين اللى هاجموا الريس مش متربيين
شعبولا كان صح وإلهام شاهين صح ونادية الجندي صح
طبعا ... هيفاء وهبي صح
وتمورة صح
د. فتحي سرور لما قال تونس هتتعلم من مصر كلنا اتعلمنا منه الحكمة
أبو الغيط لما قال مصر مش زى تونس برضه كان صح لأن ليبيا مش زى مصر
د. شفيق كان صح لأن رئيس الوزرا مالوش دعوة باختيار الوزرا
ولأن اهم حاجة فى البلد مرتب محمود سعد
أنا آسف بجد
آسف لانى افتكرت مبارك حرامي ... لكن بعد رسالة الأسرة للمصري اليوم تأكدت انهم أبرياء
أنا آسف لكل رجال مصر اللى حمونى من نفسي
لان الفلوس متلفة والمال السايب يعلم السرقة
ولأن الغرور قاتل ولو الواحد بقى له لازمة في بلده هيبقى متكبر
آسف لحبيب العادلى اجدع وزير داخلية فى تاريخ بلدي
"حبيب" إسم على مسمى لدرجة ان الحرامية في أيامه بقوا أكتر ناس محترمين فى المجتمع
عمر سليمان اللى من غيره ما كناش عرفنا الراجل اللى ورا عمر سليمان
أنا آسف يا ريس لأنى ما كنتش مقدر تعبك
انت فى سنك ده بتدفع عجلة التنمية في مصر وكمان حاطط ابنك فى حجرك وانت سايق العجلة
تعبت علشاني كتير يا ريس
لكن لأ
مش هافضل ندل
أنا هاعتذر لك من كل قلبي
مصر كلها بتبكي عليك يا ريس
بيت بيت ... زنجة زنجة
إلى الأمام إلى الأمام
التعليقات